Chin Miphun Ahremtu Colonel Zaw Min Oo

Chin State caah ramri zohkhenhtu zipeng vuanci an khanh mi Kawlram ralkapbawi Tongmangham Zaw Min Oo cu ralkapbawi a rak si lio ah Chin miphun hna cung ah thil thalo a rak tuahtu asi tiah sual an  phawt.

Chin miphun hna caah nuhrin covo he pehtlai in dothlatnak a tuah lengmang mi Chin Human Rights Organization (CHRO) nih Zaw Min Oo hi chin miphun hna cuang ah harsatnak arak petu a si tiah an chim. CHRO cu Chin miphun hna tuarfahnak kong kum 15 chung dongcat lo tein hlathlainak a tuah peng mi bu pakhat a si. Dothlatnak an rak tuahmi tampi cu CHRO nih chuahmi Rhodondendron timi cazual ah an telh lengmang. CHRO nih hin Zaw Min Oo nih thil a rak tuah mi hna cu ni le thla he thil siningn tlamtling in rikhawt an ngeih mi chirhchan in an chim mi asi.

Mah hi kong he pehtlai in CHRO i director Salai Za Uk Ling cu BBC nih interview an tuah. Thailand ah a um lio mi CHRO director nih BBC he biaruahnak ah  a chim ning ah cun,"Colonel Zaw Min Oo hi Matupi ah 2006 kum thawk in a rak um tawn mi Kawl ralbawi a si. Mah tin Matupi khua ah a rak um khawh hin thil thalo atuah mi CHRO nih rikhawt tuahmi tampi aum. Cu lakah pakhat hnih chim ah cun, a umnak kiangkap ah ummi mino hna cu an duh nalo in ralkap ah a luhter hna. Cun a kutang ralkap hna zong nih khuachung mi satil, ar le vok tbtk.. hna an mah nawl in an thah i aman zong an pe hna lo.. tbtk. arak um" tiah a chim.

BBC nih "Si ahcun, mah tiin khuachung mi ralkap ah duhnalo in luhtermi kongkau cu nanmah nih zeitin dah dikthliar tein nan theih khawh ning asi, ..cun Ralkap paoh paoh cu ralkap khomhnak nawl pekcia an si dih ko lo maw? Ralkap hna nih Zaw Min Oo min an hman sawhmi hna si hnga maw? Zaw Min Oo theng nih nawl pekmi si lovin,  acung lei nih nawl an pekmi tu si hnga lo maw?" tiah a hal.

Salai Za Uk Ling nih, "Ralkap hna pumpak sin ah kan hal tik hna ah, Colonel Zaw Min Oo nih nawl a kan pek ningin kan tuah mi asi, tiah achim. Cun Matupi i High School a kai liomi sianghngakchia hna cu mah ticun ralkap ah an duhnalo bu in an luhter mi asi. Colonel nih nawl apek mi hei si hlah hmanh seh law, a theih mi thil asi. Asinain, dai tein a um." tiah a leh.

Colonel Zaw Min Oo nih thil thalo a tuahmi hi mah i ralkap luhter lawng hi silovin, khuate lei an tlawn lio ah Chin miphun hna cu sal bantuk in kuli a phawrhtertu zong asi. Khua chung mi hna a hramhram in rian atuantertu zong a si tiah theih asi.

Kum 2008 kum ah nu pahnih le adang pa 2 cu ralkap nih Colonel Zaw Min Oo nawl hmang in an rak tlaih hna i, ralkap nih an rak hrem hna. "Mahtluk thil thalo a rak tuahmi pa hi zei tin dah Chin miphun cozah ah an chiah khawh cu si" tiah CHRO executive director Salai Bawi Mang Lin nih a chim. Colonel Zaw Min Oo hi Matupi khua pawngah vailawmtah tung phurnak ding kong nawlpeknak zong ah aitel mi Khrihfa a hremtu a si tiah theih asi rih.

Mah Kawl ralkap bawi hi Irrawaddy Pengkulh ah a chuakmi Kawl miphun a si. 1990 luan kum hna lio ah zei hual lo in Kawl ralkap nih Karen miphun le Shan khuate tampi an rak hrawh i, mi tawr le cheng an rak thahnak ralpuai hna ah a rak i tel ve i minthatnak "Yan-Maetharaw" timi medal a hmu mi pakhat asi.
Written by Salai Vanzik(Chinland)