Biahmaithi
Atu lio kan ram cu zaukphung tlennak lamthluan cungah kan kal cuahmah lio a si, rianrang tein thlen a duhmi an um, thlen a duh lomi zong an um tthiamtthiam. Zaukphung ahcun kan ruahnak a khah lomi zawn ah pakhat le pakhat upat zia kan thiam tu a herh hringhren. Duh poah in chim, duh poah in ttial, duh poah in um kha zaukphung a si lo, zaukphung timi cu midang upat le midang hnursuang lo tein chim, tial le nun kha a si.
Aung San Suu Kyi nih Election Campaign a tuahnak hmun paoh ah a chimmi cu, " kan ram ah upadi nih lai a rel a herh, upadi cungah a hohmanh um lo ding, hriamnam tlaimi hna he daihnak kan ser a herh, kan ram a daih lawngah kan ram a thangcho lai, kan ram mipi nih ngamdamnak a herh, kan ngam a dam lawngah kan ram thanchonnak caah rian kan ttuan kho lai. Fimthiamnak biatak tein tha kan pek a herh, fimthiamnak tel loin kan ram a thangcho kho lai lo, kan ram cu Pyithawngsuh Ram a si, Kawlmi zong ttanzinta phun khatkan si, minung tam deuhmi miphun kan si ca caah Pyithawngsuh Lungputa hlei in ngeih kan herh "tiah a kalnak kip ah a chim.
Tuzarh chungah Aung San Suu Kyi Rangoon khuachung Mayangone ah NLD zung a on, Hleku le Phiapung ah Election Campaign a tuah. Minung a thongthong nih a rak don. Ralkap cozah nih kum 23 renglo tadinca, radio, tv, mekazin, Journal tibantuk in a phunphun thangchiatnak an tuah nain miphun lungput an thleng kho hlei lo. Ralkap cozah nih fak deuh in an soi ah mipi nih fak deuh in an uar ti awk in a um. Atu lio cozah nih thianghlim tein caan karlak thimnak an tuah ahcun NLD nih tam deuh cu a tei hrimhrim lai tiah an zumh. Asinain USDP party nih fawi tein an zia an tthin lai lo a timi zong a um.
Mayankkung NLD Zung Onnak
Rangoon khua Mayankung Myone in NLD aiawh in MP a cuh dingmi cu Mon miphun a si i, Dr.Daw May Win Myint a si. Daw May Win Mint cu Aung San Suu Kyi orhlei kap hi a dihmi [ mit-hman a benhmi] khi a si.
Aung San Suu Kyi nih zung onnak puai ah bia chim lio a si. A tanglei hmanthlak cu U Tin Oo bia a chim lio. A tanlei i link ka thilmi te khi hmet ulaw Aung San Suu Kyi Biachim lio zoh khawh a si.
Aung San Suu Kyi le U Tin Oo biachim a ngaimi mipi
Aung San Suu Kyi Hleku Tlawnnak
Hleku khua cu Rangoon in meng tlawmte lawng a hlatmi a si caah lehlang in a kal. Hleku Myone MP caah NLD aiawh in a cuh dingmi cu U Pyo Min Thein a si, amah i 88 chanchuak Sianghkleiruan siangngakchia hruaitu a rak si. 2010 thimnak ah khan ramkhel party a dirh nain ralkap cozah nih tuahmi thimnak kha a dik lai ti a zumh lo caah party in a chuak i, NLD ah a lut. U Pho Min Thein nih, "Aung San Suu Kyi hruainak tangah lungrual tein rian kan tuantti a biapi deuh," tiah a chim.
Hleku Khua Ah Hlunghlai Taktak In An Don Lio
Aung San Suu Kyi biachimnak caah Hleku leknak bualrawl cu NLD nih an hlan i, Lentecelhnak lei vuanci nih a duh lo caah NLD nih Election commission an dohkalh caah EC nawl peknak in bualrawl ah biachimnak nawl an ngah thanmi a si.
Aung San Suu Kyi Biachim Lio
Aung San Suu Kyi kehlei kap ah a dirmi khi MP a cuh dingmi U Pyo Min Thein cu a si. Amah hi Aung San Suu Kyi nih NLD mino lei hruaitu ah a hmanmi a si. Paza ngiangai zong a si.
Chun nilin saling a si nain an duhnak nih a tei hna, nilinh zong an tuar khawh, Aung San Suu Kyi hmuh cu an chanchung caah an philh khawh lo dingmi a si. Kawlram tlennak tuanbia ah a cang ding a si caah ngakchia in upa tiang an rak chuak. Aung San Suu Kyi biachim cu a ngeih an cim hrimhrim lo.. A tanglei te hi rak hmet ulaw, Aung San Suu Kyi biachim mi video in zoh khawha si.
Aung San Suu Kyi Phiapung Tlawnnak
Irrawaddy ramthen Phiapung khua ah Election Campaign tuah ding in lehlang in a kal than. NLD zung onnak zong a tuah. Lentecelhnak lei vuanci nih leknak bualrawn hman a sianh hna lo caah NLD zungah tlawmpal biachimnak a ngeih hna hnu ah setpho ah mipi a kalpi hna i biachimnak a ngei hna. Phiapung khua aiawh in MP a cuh dingmi cu U Thein Shwe a si. U Thein Shwe cu Aung San Suu Kyi himnak caah caan saupi rian a tuanmi a si. Kum 23 chung NLD ah zumh awktlak tein a dirmi, thong zong a tlami a si. A tanglei te hi rak hmet ulaw, Aung San Suu Kyi biachim mi video in zoh khawha si.
A tanglei hmanthlak khi Phiapung NLD Zung Onna Ah Aung San Suu Kyi Biachim Lio..Aung San Suu Kyi orhlei kam ah a dirmi khi U Thein Shwe cu a si. Siangcachim a rak ttuan balmi zong a si.
NLD Zung Onnak A Rami Mipi
Minung an tam tuk caah Aung San Suu Kyi nih khualeng bualrawn ah a kalpi hna nih biachimnak a ngei.
Aung San Suu Kyi le U Thein Shwe
A tanglei hi hmet ulaw Aung San Suu nih Phiapung khua a chimmi Video in zoh khawh a si.
Careltu Hmanthlak zohtu nan dihlak cungah ka lawm. Tuchun cu Chin Natioan Day a si nain kannih Washington D.C ah a ummi pawl cu CND tuahnak hall an hammi kha a hme deuh lai ti a si caah hall thar an hawl than i, hmaizarh zarhte ni ah kan tuah lai. Tuchun cu Indianapolis CND puai cu LiVE in an piah lai ti a si caah mah cu zoh kan i tim. Ramchung ramleng ah a ummi vialte zong nih Idianpolis nih LIVE in an piahmi Video zoh khawh i zuam cio hna usih.
Chin National Day lunglawmhnak nan dihlak cungah um cio ko seh.!!!
Careltu nan dihlak upatnak le siaherhnak he,
Salai Lairamthang
( Sungsung pa )
Washington D.C
No comments:
Post a Comment