Pathian hi a ttha tuk i nihin ni tiang damnak le nunnak thaw tiang a ka pek i lunglawmhnak chimcawk lo ka ngei. Minung hi ai phu lo tuk mi kan tuahsernak zong in siseh azei lei kong hmanh ah minung le minung lung hmanh kan i tong khawh lo ko lio ah kan biakmi kan Pathian nih cun ka fa a kan ti i attang cung nemte ah a kan pawm i a kan cawm hlawm. Nihin ni tiang ah hin Pathian tello in kan nun hi a dam lo i ka zang ader i ka tha anem. Tuahkhawhmi ka ngei lo i fimthiamnak zong ka ngei fon lo tik ah hmailei kar ka hlang lai ding mi caan hna hi ruahtik ah minung sinak in lung a dong ton. Sihmanhsehlaw khua ka van ruahtthan tik ah cun keimah lawng ka si lo hi kai theih i kan sining le kan thilrit a kan chang kho tu Pa Pathian pei kan ngei ko cu ti ka van theih tthan tik ah ka zang a tlung i ka tha a tthawng, ka ruahnak a thawng i damnak le thazang thar ka hmu tthan tawm.
Ka hngakchiat lio tein a tu tiang hi zawtnak ka ngei i mah zawtnak cu Pa Pathian le keimah lawng nih theih khawh mi zawtnak asi i mah zawtnak nih cun kan nun hi hnahnawh a ka pek tuk tik caan poah hin zei ruang ko ah dah a si hnga tiin biahlanak hi kei mah le keimah zong kai hal lengmang i a phi zong ka chuah kho hlei lo. Mah damlonak thilrit pi nih ka cung i a tlun hnawh tik ah cu cu zeitin dah ka tei khawh lai i hawi bantuk in midam le milawm ka si khawh lai timi hi ka ruat lengmang ko nain ka dam khawh rih lo caah minung ka sinak in ka thazang a der i karuahnak a der can hi a tlawm lo. Innchungkhar ah pacem ka si bang in innchungkhar ah nuamhnak le deihnak hnangamnak a um khawhnak ding ah hin lam tampi in kai zuam lengmang ve tawn ko nain minung zuamnak hi chimtlak lo an rak si i santleihnak a ngeih khawh mi cu pawrhlawt ruamkainak sawh men ah khin an cang tawm. Abik in innchungkhar ah hnahnawhnak a ka petu cem zong cu a cung i kattial mi ka zawtnak ttheu cu a si i mah zawtnak ruang ah nupi le fa le tiang zong in an tuar i lungdonghnak, ngeihchiatnak le buainak voi tampi a chuahpi cang.
Hi dam lonak nih hin zei dah a kaa duh piak i zei sii ai dah ka ding ah a ttha hnga ti mi hi ka ruat zungzal. Mah dam lonak hi a hman ka thiam ah cun ka caah thilttha chuahpi tu zawtnak a si lai ti hi zumhnak cu ka ngei ko nain mah zawtnak punghman in a dam khawh pengnak ding ah cun minung kan sinak nih a tei tawn i ka zual lengmang i ka zawtnak cu apuang tthan lengmang. Hi zawtnak a duh bik mi sii ai hna cu Nichiar tein sikhawh chung in thilttha tuah khawh le sullam angei mi lam ah karhlang hi a ka duh piak zungzal mi a si i mi caa zong ah mah le sikhawh tawk in tuah khawh mi tuah hi duh piak peng ka si. Asinain Nikhat hnu nikhat in ka tuah khawh mi hi a tlawm chin lengmang tik ah ka zawtnak zong cu a zual chin lengmang ve. Ziah minung hi kan mah le kan mah hmanh kan i uk khawh hnga lo aw tiah khua hi ka ruat lengmang ko nain ka lungthin nih hin ka pumsa duhnak lei lawng lawng hi tha apek deuh peng ko rih. Azei si hmanh ah mah ka zawtnak damter kho tu ding cu kan bawipa kan Pathian lawng a si i Pa Pathian sin tuah 100% ah 100% in ka nun hi ka ap hrim hrim a hau cang. Bawipa ka nun hi nangmah nih uk law, ka thin lung ka ruahnak hna le ka thazang vialte hna hi nangmah nih uk in ka mit ka kut hna le ka ke hna zong hi nangmah nih lam hruai hna in tuah ding le zoh ding le ttuan ding tiang in lam hmuhsak hram ko hna. Minung ka sinak in kai zuam lengmang nain santleihnak an rak ngei lo. Cucaah cun atu nasin ah ka ra i nangmah na duh bang hin ka nun hi hmang hram ko. Ka zawtnak hi nikhat hnu nikhat in an zual chin i ka tha ader, ka ruahnak a tlawm i ka thin a tawi fawn tik ah zangbatnak in ka khat ko. Nangmah sin ah zumhngamnak he na sin ah ka ra!!!!!
Khah van ruattti cio hna usih! Minung hi kan mah lawng in kan nung kho lo i kan mah alawng zong in khua kan sa kho lo tik ah kan pawngkam i ai neihniam cem minung he hmanh kan i rem i kan i dawt khawh loah cun kan theihbal lo mi le kan hmuh bal lo mi cungah cun theihthiamnak cu kan ngei in zawnruahnak cu kan ngei kho taktak hnga maw? A cung i ka ttial cia bang khan minung nih kan tuah khawh mi le mi cungah zangfahnak hna le zawnruahnak kan ngeih khawh mi hna hi cu a donghnak ah cun pawrhlawtnak le ruam kainak men dah ti loah cun a dongh tiang ngai ah khin aphi chuak lak in kan tuah khawh mi cu a um hme maw? Nihin ni tiang ah hin ka nu le ka pa sin ka um lio ah ka nu le ka pa le hna le kan unau rual in rualrem tein khuasak tti khawh le nuam tein innchungkhar um hi ka rak duh cemmi le ka saduhthah ngancem zong cu a si. Cu ve bang zong cun a tu innchungkhar he ka um hnu zong ah hin ka duh cemmi le ka saduhthah ngancem zong cu a si tthiamtthiam.
Asinain mah saduhthahnak le nuamnak taktak cu teh kan ngei maw? ti hi ka ruah lengmang tik ah...... Atling mi le anuammi innchungkhar a si maw? silo dah ti hrawnghran khin a phi hi a chuak zungzal tawn. Apakhatnak ah ka innchungkhar ah kei mah nih nuam le lawm tein um khawh le hnangam deihnak um hi ka duh tik ah kei mah nih teh mi duhnak le ka innchungkhar nih an duhnak hi teh ka theihthiam piak hna hmasa in ka tuahpiak hna hmasa maw? ti tik ah cun ka tuah piak khawhmi hna le lawmhnak ka pek mi hna hi chimtlak lo lawng te an si ai! Kei mah pumpak zong in keimah duhnak hi pei a hmai ah kalter in mi duhnak zoh loin keimah sahlawh tling hmasa ka rak i zuam ko hi ti ka hmuh tik ah cun khua hi fakpiin a ka ruahter ngai ngai. Van ruattti tuah hna usih, Nangmah saduh thahnak atling khawhnak ding ah cun mi duhnak tuah hmasa kha naizuam hmasa ding le kai zuam hmasa awk hrim a si lo maw? Minung hi kan mah duhnak in kar kan hlang viar tiah hin kan palh lai lo dah, Acung i ka ttial bang khan mah duhnak le saduhthahnak lawng hi a ruatthiam mi le achim thiam mi kan si dih tik ah zei tin cun hme kan hmailam cu kan kal khawhin kan tluang rua hnga. Kan lam atluan khawhnak ding ah cun kan mah hrim nih lam kan sialta le ka remh ta hrim hi a rak hau.
Vulei cung i khua asa in a nungmi vialte nih i theihthiam khawh le izawnruahnak khawh hi duh cem cu a sinain kan tuah khawh lo cem mi hna an si. Hi theihthiam khawhnak le izawnruah khawhnak hmuh le ngei kan duh a siah cun nangmah le keimah nih mi kha kan theihthiam khawh hna le kan zawnruah khawh hna hmasa hrimhrim kha ahau. Cu hnu lawng ah mi nih cun an kan theihthiam ve lai i an kan zawnruah thiam khawh ve tik lawng ah kan saduhthahnak le kan tumtah mi lawmhnak deihnak le tlamtlingnak cu kan hmu hnga..
Acung I ka van ttial mi hna an dih lak in a tlam tling khawhnak ding ah cun nan innchungkhat ah Bawipa Pathian alu bik a si lawng ah rualremnak le deihnak le lawmhnak, hnangamnak hna cu nan hmuh lai I nan innchungkhar I dawtnak le remnak, deihnak a um hnu lawng ah mi caah le khua mi cingla sahlawh rualchan ca vialte zong ah santlai mi le bochan mi le ttihzah mi, thlachuah ahmu mi kha nan si/kan si lai. Hi article hi ka van ttial duh hnawhchan cu kan dam lonak, ka lungre theihnak vialte hna le kan thilrit vialte hi Pathian sin ah chaan hna usih law cu ve bang cun lunglawmhnak, deihnak le hnangamnak kan hmuh caan zong ah Pathian sin ah lunglawmhnak hi chim tthan hna usih. Na dam lonak na lungre theihnak vialte hna le buainak, hnahnawhnak vialte hna nih hin a kulh in an in kulh zungzal hi philh hlah law mah a tei kho tu cu Pakhat lawng kan ngei i mah a tei kho tu Pathian he karhlangtti hna usih. Bawipa Pathian tello cun minung hi santlai lo mi le zei hmanh ti khawhnak angei hrimhrim lo mi kan si zong hi philh hna hlah usih law zei tik caan poah ah Bawipa nangmah sindah ti lo in cun ti hi kan tlangtar siseh law, kan vainam zong sihram seh tiin…..
☞ Chan H Thawng ☔
➶ Chicago,IL USA
No comments:
Post a Comment