Chinland Guardian nih Kachin kan u nau ralzamm hna ca ah tiah ZBC nih Ks. 25,000,000 bawmhding in khua an khan timi ka rel tik ah kaa lawmhnak ka um pi khawh lo ca ah hi ca te hi ka rak tial. Hi bantuk khua a khangtu kan ZBC upa nan cung zong ah upatnak nganpi kan pek hna. Pathian nih nan riantuannak ah thluachuah vaniza he in um pi ko hna seh.
Voikhat cu ruahlo pi in, Thailand in KIA upa ka chonh hna lio ah, chikkhat te in.. tiah an ka ti i, telephone cu midang an pek hna. Hello.... tiah ka vun ti cu ZBC in kan upa le kha Kachin Baptist Convention nih Laiza ah an rak tlawnpi lio hna he aa ton lio ngelcel a si ca ah, an ka chonhter tik ah , ka khuaruah zong a har. Ka lawm fawn. Cuticun, voikhat cu Laiforum zong ah Kachin Baptist Convention upa zong Haka ah an rak tlawn rua hna i, sia kikawng an rak thah hna laiphung te in ti a si. Cu an thah mi hna sia zong cu attached file ah ka thil chih mi hi a si ko rua dah! Cuti in kan biaknak lei ah kan upa hna nih dawtnak an ser bantuk in, dothlennak lei zong ah Kachin kan u nau hna he dawtnak kan rak ser len ve.
2005 in a tu tiang KIO Hqrs ah hin voi 6 ka tlawng cang hna. Kumkhat voikhat poh cu ka tlawng ko rua hna dah! Aruang cu kan dothlennak a kan thawkpi tu an mah an si ca ah a si ko. Kum 15 renglo daihnak an tuah hnu in pehtlaihnak kan ngeih khawh ti lo ca ah, cu kan i pehtlaihnak serthannak ca ah ti in, 2005 in ENC delegates aiawh in ka tlawn zungzal hna. Keimah lawng si lo in, Pu Zing Cung, Pu Solomon, Pu Sui Khar zong an si ah, Pu Dr. Lian Sakhong zong nih kan tlawn hna. Ruahnak tampi kan i cheu hna lawng si lo in, thildang tampi kong ah u le nau kan si nak cu an langhter zungzal ko.
A hnubik ka va tlawn cu kan hnulei zong ah zapi sin ah ka tial cang. August thladongh ah Pu Sui Khar le adang pakhat (security kong ah chimawk a tha lo) he kan tlawng hna. Ramri ah buaibainak te te a um ca ah, Laiza tiang luhti lo in, Mangshi ah siseh, Ruili (Shweli kan ti mi khi) ah khin ralkap lei an ralbawi chang he tonnak le biaruahnak kan ngeih dih hna hnu ah (chimawk thalo hmun pakhat ah) an pu le (Hotu le chungtuan le a dang dang upa) he zarhkhat chung nifatin ti awk in tlangcung hriamtlai upa hna an zapi he meeting kan ngei peng. Kan ram kong theu cu kan ceih mi cu a si ko. Cozah lei in daihnak serding ah bialam an thlah mi kong ah UNFC buu) (Hriamtlai vialte fonhtomnak in siseh, ENC in siseh zeitindah hmunkhat te ah khua kan khan lai ti kha ceihbikmi cu a si. Kan tha a tho ngai. Ruahnak tampi lak ah lungkhahnak kan ngeihkhawh mi cu tuanbia roling a si te lai. Cu cu kum 60 hnu ah tlangcungmi vialte hna nih hmunkhat te ah khua kan khan mi chung in lungkhahnak kan ngeih mi nih teinak tiang a phak pi te ko lai tiah ruahchannak ka ngei. Hizawn ah chim ka duh mi cu: Tulio boruak (kahdohnak) ah hin Kachin mipi si hna seh, cun, zapi nih kan chim theumi cu: Kawl ralkap hi thua law law hna seh law, ti khi a si. Kan hnulei ka chim bantuk khan a tu an i kahnak dohnak ah hin Kawl ralkap lei in a thi a lo le hmapu hi an tam ngai ngai pin ah, Tuluk siseh, Kawl company an si ah, Kachin ram le Shan ram ah an tuah cuahmah mi projects zapi te hi an ngol dih. Nikhat rian an tuanlo ah cozah lei in an sungh mi hi relcawklo a si bantuk in, tuluk cozah le corporation pawl zong an sung tuk. Raldohnak ah zatlak an ton pin ah, an sipuazi zong ah an buai. (Hi kong tam deuh in ka tial than te lai)
Cozah lei ralkap nih an tuah mi cu: Bhamo-Myitkyina lam thluan ah a um mi khua ngan pi pi le Irrawady tiva kam khua tampi hna kha KIA nih hrawh an timh ca ah i thial dih uh tiah an pongh hna. Khua cu an thing dih. I kah i dohnak pawnghrawng khua pawl tu cu an mah Laiza le Mai Jaiyang pawnghrawnghrang ah cu ti cun, refugee in a tli mi hi 16,000 leng an si cang pin ah IDP kan ti mi cuti ramtang ah siseh, khuakip ah siseh, aa hrolkhang mi he cun cazin anlak khawh mi hna hi 25,000 an si. Hi zohkhenhbu te hi an ser i, a min ah "Relief Action Network for IDP and Refugees" tiah an mah kachin civil society buu 12 tluk an i fonh i an tuah mi an si. Hihna buu sin ah hin KIO nih siseh, Krifa buu hna nih siseh, ramkip Kachin le Tuluk Unan um kachin miphun hna sin in phaisa an hmuh mi hi $ 312,000 tluk a si. Ramdang sin ah an hal mi chung hi $ 30,000 fai lawng an hmuh i, cu cu an kut zong phanh dawh a si rih rua lo. Hi buu nih an zohkhenh mi hna camp hi 15 tluk a si i, camp pakhat ah minung 3000 tluk an si i, zumput ko hi an buai. Minung 2000 umnak camp ah zumput 10 lawng an ngei i, a tu tiang ah hin hngakchia 7 cu chungthlet le malaria in an thi cang.
Hiti hin zeican tiang dah khua an sak khawh lai? I kap ko hna seh, i do ko hna seh ti in a lang thapetu kan tam ngai na in, a chung ah doh le kahnak a um cang cun a rak buai mi thil a tam ning hi ruatsetlo in an mah Kachin mipi lak zong ah Kawlpawl tuahsernak lungfah lung in a rak dirtu zong an um ve. Sihmanhsehlaw, kahnak dohnak nih cun zeitluk hmanh in KIA nih siseh, KNLA nih siseh, SSA nih siseh, Kawl ralkap cu va that ko hna hmanhsehlaw, cu cu adonghnak a phi a si lo. Cu ca ah cun khua khan ahau. Zeitindah kan lohma kan chuah khawh lai?
Hiti harsat lio ah, a tu bantuk ZBC nih u le nau kan si ti in, kutput he va len an i timh mi cu, dotla mi a si i, Laiphung zong in aa dawh mi, kan biaknak mit zong in Pathian duhmi a si. Sihmanhsehlaw, ramkip Chin Krihfa buu tah kan cawl ve hna lai lo maw? GCCF group ah CBC USA zong cawldawh in an chim thluamthlam ka hmuh (ka palh sual ah cun ka ngaithiam uh), Canada zong in CCFC an si ah, Norway, Denmark, Australia, New Zealand kan zapi te in kan ti khawh tawk cio tan la hna uh sih law ti ka duh.
Adonghnak ah "Ka Philh Kho Lo" ka tial mi cauk a rel mi nih cun zeitluk indah Kachin ruang ah CNF hna a rak dir khawh i, a tu ah kan miphun nih kan i thathnempinak kha nan theih ko lai va si kaw, a rel rih lo nan um sual ah cun, rak rel ve law, na theih ko lai. Kachin le Chin hi u nau kan si tak tak ko. Aa bawm ding kan si ko. Aa cher ding kan si ko. Pathian a zumtu kan si fawn. Ka ca uk "Ka Philh Kho Lo" chung ah tialawk a thalo mi kan i dawtnak thil tampi a um rih. Cu cu can nih a kan pek tik ah chimcan a um than te lai dah!
Note: "Ka Philh Kho Lo" kha nan umnak ram le khua ah a rak phak ve rih lo sual ah, keimah sin ah vblian@hotmail.com ka cah te uh law, kan kuat hna lai. kan umnak kan i thehdarh tuk ca ah, an phanh hna lo mi hna khua nih keimah sin ah nan vun ka cah khawh.
Upatnak he,
Victor Biak Lian
Ottawa
Hmanthlak 1: KBC Haka an tlawn lio hna ah an thah mi Siapi Kikawng
Hmanthlak 2: ENC le KIO meeting kan tuah lio
Hmanthlak 3: ENC Chairman Pado Kwe Htoo Win, KIO Vice Chairman N Ban Lah, Dr. Lian Sakhong (ENC Vice)
__._,_.___
Attachment(s) from Victor Lian
3 of 3 Photo(s)
![SIA[1].jpg](https://lh3.googleusercontent.com/blogger_img_proxy/AEn0k_tKNXpg-Crn_xfNXGHkzwZtXdVA2Tdo1t0SYoeuqtA7vRnyHDKjk3U4Rq_nvywPmvKdbGHUeVU-WApzf8c5lanz-ELKwyQrvsaatQ7kyS2JNi4J=s0-d)
No comments:
Post a Comment