American Phan, A Voikhatnak Motor Mawngh Experience

Thai-Myanmar ramri i kum 20 hrawng ralzaam in a um i resettle program in ramthumnak USA ah a kalmi Karen miphun pawl cu 

Motor mawngh experience cu an nun chung ah a voikhatnak an vun ton a si. Ramri ralzaam sakhan ah an um lio ah cun cozah a si lomi NGO hna i Motor cu siizung an kal caan lawng ah an i cit tawn. USA ah kal in umhmun a khuarmi Karen miphun ralzaam pawl hna cu rian an ttuan hna i phaisa an hmu, motor an i cawk. Motor mawngh experience thar ruang ah tu thla (November) chung ah USA ah Karen mino pawl cu motor in voi hnih khelkhel an accident i fak ngai in an i khawng.

November 11, 2011 ni ah khan Texas ramkulh Houston khuapi ah kum 10 cung tleirawl Pa Le, Saw La Zu, Pa Luh, La Bawi Thu le Maung Ye hna cu motor in accident i hma an put caah Americare Ambulance Service bawmhnak in siizung ah an kalpi hna tiah cu ka khua i a ummi Karen miphun chung i mino palhat nih a chim. "An nih hi highway lampi ah an kal i lam an i palh.

Motor a mawngtu pa cu a hawi le nih lam leng ah na mawngh cang lam chung lei ah mawng tiah an ti. Motor mawngtu pa nih cun zeitin dah a si? lam leng ah a chuak chinchin hnga maw theih hlah! Lam leng lei ah cun a chuak diam i a muihnak hmun ah a va tla tiah", a chim chih. Motor accidentnak ah cun motor mawngtu pa le a chung i aa citmi vialte Karen mino minung 4 hna cu hma an pu dih i, minung 4 cu Livingston Memorial Hospital ah an chiah hna i, fak ngai in aa khawngmi Saw La Za cu Hermann Hospital ah an chiah.

Cu bantuk tthiamtthiam in November thla chung ah Minnesota ramkulh Saint Paul khuapi i a ummi Se Ye, Ka Law Ye, Saw Me le Ku Moe hna cu motor an accident ve i fak ngai in an i khawng caah siizung ah an chiah hna tiah cu ka khua i a ummi Karen miphun nih a chim.  "Zalampi zulh in motor an mawngh lio pi ah cun Ngengpi cu lam a rak tan hna. Cu Ngengpi an hrialnak ah motor horn cu thangpi in a awnhter sual buin cun motor cu a mawngh tiah", a chim chih. American ah Karen miphun motor accident hi tu thla chung ah voikhat lawng a si lo. A dang motor accident zong a tam ngai tiah theih a si.

Mahte in lungtlau buin motor mawngh sual a um bantuk in motor mawngh thiam huaha lo ruang le lam kal ning theih lo ruang zong, cun anmah motor kha midang motor nih an rak suk sualmi te hna zong a um tiha Saint Paul khua i a ummi Karen miphun Pha Zi Ye nih a chim. USA ah motor mawngh khawh ding in nawl hmuh khawh ding ah phung lam vialte ca in siseh, kutke in siseh caminpuai an phi hmaisa hnu ah an awn cun motor mawngh tikah i phung le lam vialte zulh a si. "Motor na mawngh a si ahcun ritsii na tawng lai lo.

Cun motor a tam tuk caah lam tan tikah ralringte in tan ding. Lam duh paoh in tan kha ttih a nung ngai. Motor kan mawngh cang a si ahcun hnu-hmai, keh-orh tthatein zoh in ralringte in mawnght a herh tiah", Pha Zi Ye nih a chim.

Thai-Myanmar ramri i Karen miphun ralzaam No. 2 le 2 tiah sakhan pahnih a um i ralzaam minung 17,000 leng an um. Kum 2008 in 2011 tiang USA ah Karen ralzaam minung 10,000 leng an kal.

Written by Roberthramhleicung (Global Chin News)