Tulio hriamtlai phu chonhbiaknak umtuning tlawmte ka hmuhning ka hun tial. Tlangcung hriamtlai phu hna Cozah he 'written agreement' an tuahmi pawl theihtok tein ka rak rel ve ton hna. Ka theihtok ah phu 10 nih Cozah he kahdaihnak min an thut cang. Phu 4 nih State Level talk an lim. Phu 6 nih Union Level talk an lut cang.
Cozah kalpi dan:
Cozah nih kalpi a timh dan hi 1. Kahdaihnak 2. Thanchonak 3. Ramkhel biaruahnak in rem a kan timh. Phundang chim ahcun 1. State Level 2. Union Level 3. Palimen Level tiah dotthum in chonh a kan timh. Phundang chim rih ahcun 1. Initial agreement 2. Common political agreements (Pinlung bantuk Civui) 3. Permanent peace agreement (Hluttaw) tiah kalpi a kan timh. Biatak nawn in an hun kalpi tikah dirhmun phunthum in kan hun i then.
1. KIO nih political issue first, cease-fire second tiah lamlai ah an tang rih
2. KNU, CNF le phu zeimaw nih cease-fire first, political issue second tiah hnatlaknak min an thut
3. Cozah nih cease-fire first, development second, political issue third tiah a kan kalpi cuahmah
Cozah Palai:
Thein Sein nih Union Vuanci kha State ah palai in an i telnak ding rian a phot hna ti kha a lang. Union Level talk ah Aung Thawng nih biapi in bia a al hna. State Level ah cun State Cozah he min thut a si nain Union Cozah leiin Aung Min nih tambik bia a al hna. Union Level talk (initial agreement) ah Aung Min nih a hruainak cu a um ve nain a mah hruainak hi cu hramthok (initial Union level) deuh long a si. Development kong a tam ngai i political issue hnatlakmi a tlawm. Cucaah Aung Thawng hruaimi biaruahnak (Union Level) ah hin politik a tung a tlangpipi in an tlakpi i an i rengh len kha hmuh kho a si. Aung Thawng level ah 1. non-secession min an thut dih ngot 2. one-arm force, kong zong an ceih (eg. Wah and Mongla) kha hmuh a si.
Cozah chunglei Pawlasi:
Cozah nih 1. non-secession timi minthut dih 2. Doh-azi pathum minthut, timi cu biadanh (pre-condition) in a chiah ti cu lang-hngan in a chim ko nain a chunglei in kalpi an timh taktak daan tlaihtung ngeih dawh an si. Cucu 1. Kahngolnak serpi 2. Thanchonak phunphun tuahpi 3. Ramkhel hnatlaknak zeimaw tuahpi 3. 2008 Phunghram zeimaw remhpi, 4. Hriamtlai phu hrawh dih in Tatmadaw pakhat long umter 5. Hriamtlai phu hna party dirhter or ramri cawng ralkap or pihthut sit (local militia) ah thlen 6. Party a dirhmi hna 2015 thimnak luhter i Palimen chungin politik tuahter, hi a timhpi mi hna a si in a lang.
Hriamtlai phu hna:
Hriamtlai phu hna ah KIO hi an dirhmun a fek ngai. Mon nih an zulh. Hi phu hnih hi kahdaihnak a ser balmi an si caah hlanlio ah hlenthawi an innmi a fahning kha an philh lo caah haak ngai dawh hi an si. KNU hi an rak haak ngaingai nain tutan cu an hnatlakmi rel tikah ruahnak lengin an neem. Mahbelte, hnatlaknak min an thut dih in KNU chung lila um lunghaakphu nih an den ve hna i hmailei kalnak ah harsatnak zeimaw an tong te kho men. Wah nih an duhmi cu Wah State ser a si. Mahbelte, Wah le Mongla hi politik nakin development a biapi in a chiami an lo ngai i development a tomtom in an cheh hna ahcun an dam te kho men ve. Shan (RCSS) hi an dirhmun a fek ve nain an agreement ah politik a tlawm rih ve. Shan (SSA-N) belte an agreement ah politik zeimaw a rim a nam nain ram in chuah lo min an thut ve cang. Cozah ralkap he min an thut hnuah an i kap hrulhhralh than nain dai than colh dawh an si. DKBA zong Karen ramri cawng Cozah ralkap nih an meithal an chuh hna ruangah hnatlaknak kan hrawh an ti than nain 'Thein Sein nih pe than dih uh' tiah awder a pek hna caah an dai than te ko lai. KNPP (Kayah) cu Marh thla chungah min thut dawh an si ve. CNF zong State level tiang cu mipi kan lung a si ngai. Union Level tlawmpal ah an phan ve lai i hi an phanh hlan cu (politik an ceih rih lo) tikah chim awk tampi a um lo nain State level agreement ah kan hlawhtlinmi nih kan dii a riamh sual lai i politik ceih tikah kan neem sual lai ti phan a hun umnak zawn tete a um ve lengmang.
Development tiah milung a rak zor
State Level talk cu a hawng long a um. Union Level Talk hi a mu umnak a si. State Level agreement tiang cu ka lung an rak si pah ngai dih. Union Level 'agreement' pawl kan rel tik belah ka lung a rak si lo ngaite. Development nih a khuh tuk deuh ka rak ti. Development sii nih a kan damh lai lo ti ka fiang. Political stability tlamtling a um lo in development rian a fek kho lai lo ti ka fiang. Political instability buu cun investment pipa hohmanh nih an tuah ngam lai lo ti a fiang. Khin Ngunt chan umtuning nih hmuhton a kan pek cang caah ka thin a rak phang. Thein Sein le Aung Min nih 'developmen in an dam diam lai' an kan ti fawn rihmi an biachim ring taktak in kan theih fawn tikah ka lung a hring chinchin. Union Level talk a phanmi hna sining (written agreement) kan rak zohfian tak tikah Tlangmi nih kan duhmi a lang rih lo.
1. Federal biafang a cuang rih lo. Federal biafang an zenh deuh zongah Pyidawngsu sitsit timi tal
2. Meithal kan i tlaihhnawh chanmi self-determination cu a rim hrim a nam rih lo
3. Phunghram remh kan duh. Hihi written agreement khoika hmanh rel awk in a um rih lo
4. Development project rim nih a runh tukning kha ti awk a tha kho lo
5. Cozah lei duhmi non- secession kongah an hlawh a tling taktak hnuah one arm force principle in a kan naam rih
Cucaah State Level talk cu hriamtlai phu nih an naam deuh ngai mi a lo nain Union Level talk an phanh tikah Cozah nih an naam deuh tuk ve ngai hna tiah comment ka rak tial bal cang.
Tlangmi kan duhmi cu State level in Union Level talk ah, Union Level in Pinlung bantuk Civui ah, Pinlung bantuk Civui in Parliman ah dot khat hnu dotkhat in an kan thawn lengmang lai i donghnak ah ralkap nih uknak an lak beh sual lai ti kan phang. Khin Ngunt chan ah National Convention ah tlakpi te uh an kan ti bantuk in pokpalong a rak si bang tha lo tein an kan hlen hawi sual lai ti kan phang.
NMSP agreement nih milung a thawhter than:
NMSP (Mon Miphun) an 'agreement' ka hun rel cu ka thawpi ka chuah than. Tlangmi dang vialte an agreement nakin politik haw a hung nam bik. Tlangmi vialte ai awh in Cozah an nam khawh ning zong tampi a cuang. Dr. Lian Sakhong nih 'cease-fire talk' hi 'political talk' ah a pungsan an thlen hrimhrim a hau, a ti lengmang mi cu Mon agreement ah fiang tukin a hun cuang. Phu dang pawl agreement he ai lawh lonak tete ka hun thim hmanh lai!
1. Rampumpi kahngolnak (nation-wide ceasefire) tuah ding. Tlangmi umnak hmun cheukhat ah i kahnak ngol colh ding. (Hi nation-wide cease-fire timi hi kum 60 chung halmi a si, a tu long written in Cozah nih a hnatlak)
2. Kahdaihnak ser hnu in ni (45) chungah Political dialogue kan thok lai. (KIO he joint statement ah 'political means' timi te an telh ti lo cu khoika agreement hmanh ah 'political' dialouge' tiah an tialnak a um lo. Peace process, eternal peace, permanent peace, Union Level-peace making group ti biafang longte an hman. National reconciliation timi biafang zong an hmang duh lo. National re-consolidation an ti peng. Mon he cun political dialogue an hun ti lengah national reconciliation zong a cuang cang)
3. December 2012 hlan ah kahdaihnak min nan thutpi kho dih hna lo zong nan thutpi khawhmi vial in political dialogue kan thok cang lai.(Cozah nih a chin-suai an duh zongah hi agreement nih hriamtlai vialte caah a tlaih cang lai. UNFC min in an kal lai. Tlangmi vialte ai-awh in Cozah an naam kho ngai ti kha a lang)
4. Phu thumnak (3rd Parties) kha biaruahnak ah (observer) in telnak nawl kan pek hna lai. (Hihi a biapi taktak ko. Political consensus an tuah kho lo deadlock a chuah cun zeitindah bia an khuai te lai tihi lungrethei a si. Tucu UNO a si lo ah Asean ram (USA, EU) zong kha mediator ah an i telnak lam a ong kho mi a si cang)
5. Mipi he duhpoh in ton khawh, ramleng NGOs he pehtlai kho, Media he ton khawh, tadin thanh khawh a si lai lengah a hun i dang khunmi cu Foreign diplomats he zong i ton khonak zong ai tel (Hihi a ho agreement hmanh ah a um lo mi a si)
6. Politik ruangah thongtla vialte chuah dih ding. Mon (NMSP) ralkap thongtla zong chuah ding. (Politik ruang thongtla timi biafang hi Cozah nih a pawm bal lomi a si. Tutan cu an hun hman lengah thongtla vialte chuah dih titiang hna an hnatlakpi hi khuaruah har lei a si. Cu long si loin Mon thongtla vialte chuah dih ding tiang an nam kho rih cu an ti kho ngai tinak a si)
Tlangkawmnak:
Kawlram democracy movement pi nih tinhmi pakhat ah kan i khat dih i cucu: 2008 phunghram remh hrimhrim ding, timi zawn ah a si. Pi Suu Kyi hruaimi democracy groups an hmuitinh pakhatnak a si ve lengah Tlangmi hriamtlai phu (ethnic groups) dihlak pakhatnak tinhmi zong Phunghram remh a si ve. Zeitindah kan remh kho kun lai? Cu kawltung phakkhonak caah lampi pahnih a um i pakhat cu: Pi Suu Kyi (Parliamentary process) in a si i a dang pakhat cu hriamtlai phu he chonhbiaknak (polital talks) lam in a si. Zeilam hidah kawltung a kan phanhpi kho deuhmi lampi a si lai?
Pi Suu Kyi lampi cun bye-election a tei ngai zongah Tlangmi umnak ahcun a la dih kho lem lai lo. Thutnak 47 long cuh ding a um fawn caah Palimen chungah a thazaang a tlawm tuk rih lai i phung ning (legally) in phunghram remhnak caah hnabeisei ngam a si rih lo. Thein Sein nih Washington Post interview ah 'mi pakhat longin phunghram remh kho a si lo' tiah Pi Suu Kyi a chim hnawh lengah USDP general secretary Htay Oo nih 'phunghram remh a hau in kan hngal rih lo' a ti fawn tikah Palimen chung cun kan har rih kho men. Pi Suu Kyi nih Palimen chungin thlennak nganpi (major reforms) a tuah kho lo hmanh ah thlennak fami (minor reforms) zeimaw cu a tuah kho mi a um lengluang ve te ko lai i 2015 thimnak hnu lebang cun hi lampi hi ruahchannak a um bik te lai.
Tulio dirhmun ah ruahchannak nganbik a a kan petu lampi cu : Tlangmi he chonhbiaknak (peace talks process) hin a si bik. Thein Sein te zong nih 'phunghram kan remh lai' tiah bia an tiam len cang hna caah hi lam hi kawltung a kan phanhpi khomi lampi a si. Mahbelte, phu tam nawn he an hnatlakmi kan rel tikah kahdaihnak level vialin dihpi a kan timh rua. Thanchonak (development projects) in kan zawtnak thlop a kan timh rua, tiah kan lung a rak zor deng mang. Hlen hna an kan hlen hawi sual lai tiah kan lung an hring thok.
Tuchun ah cu lunghrinnak le lung zornak tete cu Mon (NMSP) agreement nih a hun chimh dih than. Political talk taktak caah a hrampi zeimawzat an tlakpi kho kha hmuh an si. Sihmanhsehlaw, hlei dot tampi kai ding kan i duh rih. KNU President Tamla Baw biabang 'step a thong' in zawh ding kan ngei rih. Kan rak tial bang tlanglawng cu ai dinhnak in a chuak phot cang. Khoika dah a kan dinhpi lai timi kan fiang kho deuh rih lo. Rang tuk in a kal caah kan thin hna a phang. Lam tantim ah khamtu hna a ngei sual lai tiah kan thin hna kan i domh. Hi Tlanglawng hi Tatmadaw le USPD lunghaak phu nih lam lai ah an dirter thut sual lo ahcun Mon miphun he an hnatlakmi rel ah tluang tein dinhnak hmun a phan kho dingah lam ding a hun zawhmi a lo cang. Tlangmi kan caah ruahchannak a phortu Tlanglawng a si caah lam lai ah poipang a ton sual nak hnga lo ven cu mipi kan rian a si ve cang lai.
No comments:
Post a Comment