Rangoon : April ah MP i thimnak (by-election) a dikmi maw dik lo, a zalong maw zalong lo timi nih Kawlram cungah European Union nih ram
chawlehthalnak (sipuazi) a phihchapnak ding dantatnak le a onpiak cangnak ding kong bia a khiah te lai. A dikmi le a zalongmi thimnak a si maw, si lo rak cuan rih ko u, tiah Aungsan Suu Kyi nih February 14 press conference (khawmpi) ah German Economic Cooperation and Development Minister Dir Nieble he bia an chimnak ah thawngla pawl sinah a chim.
April Nikhat ni by-election ah mee thlatu ding mipi nih an thinlung taktak in an duhmi ram hruaitu thimnak mee an peknak ah a zalong maw zalong lo, mee an thlakmi dikte in tuahto a si maw si lo; a zalongmi le a dikmi thimnak a si lo ahcun, European Union nih Kawlram cungah ram chawlehthalnak (sipuazi) phihnak in dan a tat rih lai; a zalongmi le a dikmi thimnak taktak a si ahcun, ram chawlehthalnak a onpiak cang lai, tinak a si. 2010 General Election lioah, thlachiat ruat lo thudan sang cung kai duhnak thinlung he lih le hrakhrawl in mee firnak (vote rigging) a um ruangah mawhchiatnak nganpi he thudan sang cung ah a kaimi an um caah a si.
Suu Kyi nih a chimchapmi cu: “European Union chungtel ram hna he (Kawl) ramzung a ceu chin khawh nakdingah i ton le biaruah hi kan caah a biapi zungzalmi a si. Zeicatiah, annih cu kan ram ah di-maw-ka-re-si uknaklei lam zirhnak dingah a kan ttanpitu kan hawikom ttha an si caah a si” tiah a ti.
Niebel, German Economic Cooperation and Development Minister nih hmualfaak khun in a chimmi ah: “April by-election cu di-maw-ka-re-si phungning in a dikmi le a zalongmi a si a herh. Cun, ram ca tthatnak ruah ruangah ramkhel thongtla pawl thlah a herh fawn. Cu hnu ah, a piangpaimi ram remdaihnaklei thok colh a hau. Cuti a si ahcun, EU nih Kawlram chawlehthlanak a phihmi hi a dotdot in a onpiak ko lai. April thla thimnak ah ningcang loin mi dawnkhaantu an um sual ahcun, Naypyidaw nih ram chawlehthlanak a ruahchanmi vialte cu zatlak puicimhnak nih a tlunhnawh ko lai” tiah a ti.
Atu zarh nihnih ni i Suu Kyi he an i ton hnu ah President Thein Sein he zong tonbiaruahnak an ngei. Cu kong he pehtlai in, a chimmi cu: “President a si hnu in, Kawlram thlennak a ummi tete nih ka lung a ka ton ngai. Tlangcung hriamnam tlai rakap hna ram remdiahnak kongah an thil tuahning zong kai cinken. April nikhat ni in thok dingmi thimnak zong a dikmi le a zalongmi a si khawh naklai forhfialnak bia ka beuh hna. Kawlram tthat nakding kongah pehzulh in lohma kalpi awkah anmah nawlngeitulei nih timhcia kan si ko an ka ti” tiah a chim.
April thla MP thimnak ah hin MP thutdan 48 i cuhmi chungah Suu Kyi hi ai zuam ve ding a si. Anih hi Rangoon ramtthen Kawhmu peng, mirethei le misifaak khuasaknak peng tiah an timi caah MP tlin nakding a dirpitu a si. Kum 66 a si cang ko nain, ram caah chiandeih note bang rambia aupi (campaign) ah ai choklet cuahmah ko. “Zei bantuk Di-maw-ka-re-si hmanh si ai kon, duh a nungmi a si khawh nakdingcaah cun, i chawh, i leh in rambia aupi hi a biapimi thil umkalning a si” tiah a ti.Ch:Mizzima News
No comments:
Post a Comment