Windows 8 A Chuak Deeng

Windows 7 hmanh kan von hmang manh hmanh maw kan ti liopi ah Windows 8 a chuak tthan hoi cang ai. Windows thar chuah le min thar hlawi nih kom hman nun a tthinter zazau i, daanthiamnak kong a kan hlatter lengmang ti awkin a um. Cucu kom hman daan hmanh a thiam set lo kum upa deuh pawl hrangah cun khuaruah phahla ngaiin a kan chiah.

Windows XP a chuahka ah khan Windows operating system ah cun a ttha bik si lai tiah Asia leiah a hon laar lingcing ah Windows Vista a chuak lai ti a si. Windows Vista a hong chuak i, zaapi zaaraan nih a hman hmanh kan hman khawh hlanah Windows 7 a chuak lai ti a si hoi. Windows XP in kom dang thar a’i cawk kho rih lo kannih pawl hrangah atu Windows 8 a chuak cang lai ti a si hoi le ‘aize’ ti lo awk khi a ttha lo.

Microsoft.com i OS Windows 8 hi zeitik hrawngah chuak ding ti cu Microsoft nih a thanh rih lo nain tu kum 2012 chungah hin chuak te dawh a si tiah PC World nih a ruahtdomh. Windows thar a chuak lai ti a si nain oidang ttheo bang, Microsoft Windows hlun kha remhchom le siamchom le update tuahchom menmen a tawn bantuk zong a si kho; cun si lo zongin a um kho.

PC World chimnak cun a hlanta sining he hin tam ngai thleidannak le siamremhnak a um lai tiah a ti. Windows 8 nih kum 2012 kom kan hmanning pawl zeitimaw in a thlen khawhnak kong a ruang panga in von langhter usih.

Ribbon UI (user interface)

Ribbon timi cu Microsoft Office 2010 ah biaktein hman a hong si. Hlanta Office ah cun drop-down hmeh i list tampi a hong tlami chungin duhmi tool kha hmet tthan a si. Nain Office 2010 ah cun mah drop-down list kha hmang ti loin ribbon timi Tab pakhat tangah tool tampi kha an fun i, mah Tab zawn chungah cun duhmi tool kha i thim tthan a si. Ribbon in toimi Office 2010 a hmang thar pawl nih cun an i ziak lo ngai. Sinain, hman a hong sau ahcun i ziak thluahmah si ko lai tiah Microsoft nih a chim.

IE 10 (Internet Explorer 10)

Atu tiang tlai bik verstion kan hmanmi IE hi version 9 lawng a si rih. Windows 8 ah hin version 10 hman a si lai ti a si. Mah hi cu mi soilemnak fact pakhat menmen a si tiah ruat khawh a si. IE 9 cu Windows Vista, Windows 7 le cheukhat Windows XP deuh lawngah hman khawh dingin an siam ti a si. IE 10 tu ah cun Windows Vista zong hman khawh a si lai lo. Windows 7 le tlai bik version pawl cung lawngah hman khawh si lai ti a si. IE 10 hmang kho dingah Windows version an limitmi rengreng cu ruah ah Microsoft nih zeitlukindah market a play ti cu a fiang ko

Microsoft Store

Apple platform ah software application cawk duh tikah Apple Store ah kalin cawk lengmang a si bangin Microsoft zong nih nawl a’i cawn ve cang lai. Microsoft 8 hmangtu nih software application cawk a duh ahcun Windows Store ah kal hmasat a hau lai. Mah Windows Store lawnglawng in Metro-syle apps pawl cawk khawh si lai. Phundang in chim ahcun Microsoft nih na PC cungah zeibantuk apps pawl thun na duh timi kha a fingkhawl (control) khawh lai tinak si. Atu laite le cu hlan ah cun aho paoh nih an duhmi software kha online ah cawk le thun khawh a si cu mu. Sinain, kapkhatlei ah cun mahtin Microsoft Store in app pawl cawknak thawngin a herh lomi malware, hrik le adang kom poimawhnak pawl hrial khawh a si lai caah a him deuh lai tiah an ti.

Thumb Drive cungah Win OS

Windows 8 i uartlai bik langsan (feature) pakhat cu mah Windows 8 dihlak le bootable Win 8 OS pi kha USB thumb drive chungah khumh khawh a sinak hi si. Khual na tlawn duh tik le hmun dang kalpi na duh tikah na Win 8 OS ningpi kha mah na thumb drive chungah na rawn lai i, PC hardware a umnak pakhatkhat ah boot up tuah khawh a si lai.

Komphel

Windows 8 hi touch-screen device pawl ah hman khawh a si lai caah Microsoft OS hmang laptop le komphel cungah zong hman a si telai. Atu lio komphel market cu Apple iPad 2 nih a cuul cuahmah lio si.

Amazon ser Kindle Fire zong hlawhtling a rak si ngai ve, sihmanhsehlaw business tlai mobile device pawl hrangah iPad tlukin a ttha lo an ti. Windows nih mobile device le komphel hna cungah Win 8 a thun tik le man deeng nawn hna in a chuah khawh ahcun a hlawhtling ngai telai tiah zumh a si.

Windows 8 beta version – hneksak khawhmi cu a ra laimi thla 2-3 chungah a chuak kho men nain Windows 8 taktak cu quarter 4 (August – December) chung hrawng lawngah a chuak te kho men.

(The Chin Star in lak mi)