Hillary cu ramhun U Thein Sein he Naypyidawt ramhun innpi ah ton biaruahnak an ngei. An i tonnak thutdan le cabuai zoh ah Siangpahrang thutnak bang, suihang hutmii lawng te. Than Shwe hi Siangpahrang can a duh an ti hi si dawh ngai a si rua. Nyepyidaw khua a serning, siangpahrang bantuk in inn le lo cabuai le thutdan a hunning zoh ah a lungtli in siangpahrang si cu a duh taktak ko lai ti a lang, asinain zeiruang bik ah dah puanzar hnulei ah a dup ziar kun? timi cu amah lawng nih a theih dawh a si. Thein Sein he an ton lio ah chakum Korea he a thli tein nuclear ser nan i timh ding a si lo, IAEA phung ning te in nan zulh a herh tiah Clinton nih a chim. Thein Sein nih kawlram ah thlennak taktak tuah kan i tim ko tiah a leh ve.  Thlen duh lo lei ah a ttang tiah ruahmi Amyotha Hlutdaw Chairman U Khin Aung Myint he an i tong, sanction kong le thlennak kong, parlianment nih upadi an sermi kong te hna an i ruah. Ramrian ttuan ruangah thongthla mi vialte nan chuah hna ahcun sanction zong hmuamsam tete in kan bauh ve lai an ti. Ralkap uknak ah kan kir ti lai lo tiah U Khin Aung Myint nih amahkhan a si ko tiah a chim chih.  Pyitu Hluatdaw Chairman Tura Shwe Man he tonnak an ngei ve i, Tura Shwe Man nih ram rian tuan ruangah thongtlami kan chuah ko hna lai. Tlangcung mi hna he zong daihnak kan ser lai tiah Hillary Clinton sin ah a chim. Kan ram thanchonak caah a herhmi bikmi cu kan ram thil chuak ramdang ah kan kuat khawhnak dingah nan kan bawmh ve a hau, cun fimthiamnak (Education) ah biatak tein ttan nan kan laakpi a herh tiah a chim.   Shwetagone Pura a zoh, Hillary hi Sunday ah a chuakmi a si an ti i, Shwetapone pura i, taninganuai kil ah pangpar a chiah ve an ti. Rangoon khua um US palai inn ah Hillary nih Aung San Suu Kyi cu zanriah dum a sawm i, anmah pahnih te lawng rawl an i hrawm. Sianginn kaiti an si an rak ti bal ka theih, an kum zong a tthirual si dawh a si. An pura le an mui zoh ka cim hna lo. Aung San Suu Kyi hi Kawlram ramhun siseh law, US rak tlawng sehlaw, US congress innpi ah khin biachim sawm hna sehlaw ti ka ruah ah keimah lawng hmanh ka lawm tuk cang.  Hillary nih Aung San Suu Kyi a zoh dan khi, a mithmai ah upatnak, zangfahnak le dawrtnak hmuh khawh a si.    Hlutdaw Kuzale minung 40 tluk nih Hillary cu an ton, NUP, NDF, USDP, RNDP, SNDP le party cheukhat an i tel, CNP le CPP tal an i tel ve hnga maw ka ti i, Laimi MP ka ngiat len hna na in an mui ka hmu kho lo. An i tel sual ahcun a hngalmi nih thawng kan thanh te u.  Amyotha Hluatdaw Kuzale pawl he an ti ton lio, Amyotha hluatdaw kuzale pawl hi Pyituh hlutdaw kuzale pawl nakin thlen a duh lomi an tam an ti i, bia an chiahmi cheukhat tete zongah pyituh hluatdaw he an ruahnak a dang theu. Aung San Suu Kyi nih cun mah bantuk ruahnak a danmi cu dah kaw democracy kan ti lengmang mi cu a si a ti.  Tuchun ah hin NLD party hruaitu hna le CRPP hruaitu cheukhat hna he tonnak an ngei lai. Aung San Suu Kyi inn ah zanriah dumtinak le thawngzamhnak zong an tuah lai. Hmanthlak hmuh ve nan duh ahcun Yahoo mail i tuah u, gmail in cun hmanthlak nan hmu kho lai lo. Careltu le hmanthlak zohtu nan dihlak cungah ka lawm. Siaherhnak he, Salai Lairamthang (Sungsung pa) |
lunglen ni a si ko. Nunnak cu tlaih awk a ttha fam lo. A tuanbia tu cu Kawlram le Chinmi kan van hmunh chung a van hmun ve ko lai. Kan nun chung/ kan chan ah Chinmi nih kan tonmi Chin Pasal ttha pakhat a si. Hika hin amah upatnak kan pek i a chungkhar sinah kan ngaih a chia ve.
Pu Van Kulh Bia Rovuih
Pu Van Kulh tuanbia tampi lakah atang i Pu Ceu Uk Thang nih a van ttialmi tawite hi kan van tar. Editor/GNC
Colonel Van Kulh (BGM, BAR)
Pu Van Kulh cu Hlawnceu hrin Pu Tai Thio le Pi Sun Dim nih 1925 kum October 1, ah Khuahringtlang, Tikhuagtum khua ah an hrin, Chuahpi unaurual panga lakah amah lawng hi pa a si. Tlangpi tangli sianginn in 1938 kum ah tangli a awng. Tlangpi khua ah sianginn a rak um ka te a si. 1938 ah Hakha peng in Scholarship a hmu i 1942 ah Falam Anglo Vernacular High School in tangsarih a awng. Vawlei ralpi II Lairam a phanh caah sianginn a pit. November thla ah Mirang pa Major Davidson sawmnak in Western (Chin) Levies ah a lut. Ralkah lei minthatnak “Burma Gallantry Medal” timi BGM voihnih a hmu. “BGM voihnih a hmumi midang ka theihmi an um lo” tiah a ti..
1945 ah Japan ral a dih in university ah ca ka cawng lai ka ti nain Mirang an Commanding Officer nih a auh i, ralkah na thiam, Mirangholh thate in na holh kho, Mirang ca zong thate in natial khawh, cucaah ralkap in chuak hlah, ralkap chungah cacawnnak le training tuahnak tampi a um, na thiam chinchin lai, na reng zong a kai chin lai, tiah a rak ti. Cu cu a lung a pem i ralkap in chuak loin ralkap chungin cunglei tiang phanh khawhnak aa zuam.
Cubantuk tein 1946 ah Burma Army Education School a kai i, thate in “First Class” in a awng. Cucu tanghra he aa tlukmi a si. Cun 1953 kum Lashio an um lioah a leeng in matriculation camipuai a phi HSF a awng. Karachi ah khin 1945 kum ah Intelligence Course a kai i thate in a awng. Mirang sayate um lio 1951 kum ah Burma Army Staff College a awng. Luatnak kan hmuh hnu ah ralkap upadi lawng si loin civil upadi zong a cawn chih i thate in a awng.
1942 November thla, Levy ralkap a luhka tein bokhat (Jemadar) a hmuh colh. 1945 December 15 ni ah Mirang reng (Rank) Second Lieutenant a hmuh. 1946 ah Lieutenant ah a kai i 1947 ah bothum (Captain) ah a kai than. 1948 luatnak kan hmuh kate ah Major reng a hmuh. 1950 kum ah (kum 25 a si ah) Battalion Commanding Officer, Lieutenant Colonel a si. 1962 kum (tawhlanzi cozah an kai lio) ah Full Colonel reng ah a kai. 1971 kum ah kawlram pumpi huap Social Welfare Deputy Minister a hmu. 1974 kum ah Minister a si. 1978 ah State Council Member ah a kai. 1988 kum buainak ah khan penson in aa din. Acozah rian, ram le miphun caah minchiatnak pakhat hmanh um lo tein kum 45 bak a tuan.
Laimi nih kan hluang ruhpi ah kan ruahmi Hakha-Gangaw lam pi khi Pu Van Kulh hruainak thawngin kan pemh khawhmi a si. Amah zong nih “Party Council zuamnak le mipi zuamnak thawngin Gangaw kan rak pemhmi kha lunghmui awk bik a si tiah ka ruah. Aho hmanh nih zanmang hmanh ah an rak manh khawh lomi thil Pathian nih a kan tuahpiak caah lunghmuih lo awk a tha lo. Pathian kan thangthat tuk”, tiah aa lunghmuihnak kong a langhter. .
Pu Van Kulh hi fanu pakhat le fapa pathum a ngei. A fanu cu, Van Sui Em (Emma) a si. A pu Chief Thang Tin Lian fapa Pu Za Hre Lian min sakmi a si. A fapa pawl cu; Van Thang Chin Bik (tleicia), Van Lian Chin Thang le Van Hniang Lian an si. “Kaa bochan cemmi ka fapa upa bik Thang Chin Bik nih tinbaw lei chief officer a awnka te ah Singapore ah a ka thihtaak, ka van a chia tuk” tiah a ti. (Thang Chin Bik hi a pa lei chungkhat le Laimi a tlaihchan bikmi a fapa a si. A ni le zong a dawt ngai ngai hna. Hakha zong ah a rak tlung i kan u le deuh pawl nih Rungtlang ah an rak kaipi bal).
Ceu Uk Thang
No comments:
Post a Comment